Granda sukceso - la INA-kunsido
dum la 90-a Universala Kongreso en Vilno

    

Internacia Naturkuraca Asocio elstaras inter aliaj fakaj asocioj per alloga kaj interesa programo en sia kunsido dum UK. Ĉiujare INA ofertas fakajn prelegojn kaj interesajn informojn pri naturkuracado. Tial INA allogas pli kaj pli da partoprenantoj. En Vilno ni atingis la rekordan nombron de pli ol 180 aŭskultantoj. Eĉ estis multe pli da homoj, kiuj deziris partopreni, sed ne plu trovis lokon. Oni eĉ staris ĉe la muroj.

Ĉar la prezidanto de INA, d-ro Puramo CHONG, Koreio/Usono, ne povis ĉeesti la kongreson, la kunsidon gvidis vicprezidanto Harald SCHICKE, germana naturkuracisto. Krome ĉeestis en la podio alia vicprezidanto Kees RUIG, Nederlando.

Kiel ĉiam, la kunsido komenciĝis akurate. Ĝi dividiĝis al tri partoj:
1. Raporto pri la laboro de INA, salutvortoj, aktualaj novaĵoj
2. Prelego de Harald Schicke pri diabeto
3. Prelego de Kees Ruig pri atento

1. La laboro de INA dum la pasinta jaro estis tre sukcesa. Nia organo regule kvarfoje aperis tute akurate. Dum la UK en Pekino INA disdonis grandformatan 52-paĝan revuon al ĉiuj kongresanoj. Bedaŭrinde al INA mankas, simile al aliaj fakaj asocioj (ISAE, UMEA), artikoloj. Tial dum la kunsido Schicke alvokis ĉiujn ĉeestantojn verki pri siaj spertoj. Fakte ĉiu ajn homoj, ĉu fakulo aŭ ne, spertas sanon kaj malsanon, spertis diversajn kuracadojn aŭ terapiojn. Tial ĉiu homo povus raporti pri tiaj spertoj, ĉu el fakula, ĉu el laika vidpunkto. Pro manko de artikoloj ĉijare granda revuo bedaŭrinde ne povis aperi. Anstataŭe INA disdonigis al ĉiuj kongresanoj informilon kun aliĝilo. Salutis la kunsidon la prezidanto de UMEA (Universala Medicina Esperantista Asocio) d-ro Ferenczy, kun kiu INA kunlaboras. Li distingis INA-n per diplomo de UMEA pro nia bona laboro en la kampo de naturkuracado. Sekvis funebra minuto omaĝe al Saionji Masayuki, iama vicprezidanto de INA, kiu tro frue mortis antaŭ kelkaj monatoj. Honore al li kaj al lia sukcesa kaj modela laboro, la ĉeestantoj ekstaris memorante lin. Grandan parton de la unua triono okupis la 2-a konferenco de INA, kiu okazos de la 5-a ĝis la 9-a de decembro en Ŝanhajo. Vi legas aliloke pri ĝi.

2. La prelego pri diabeto montris, ke ĉiam pli kaj pli da homoj en la tiel nomataj industriaj landoj malsaniĝas je diabeto II, kiun oni antaŭe nomis maljunula diabeto. Intertempe jam infanoj kvinjaraj suferas je ĝi. La prelego montris kaŭzojn; precipe ĝi pruvis, ke la alopatia medicino ja terapias, sed ne kuracas ĝin. Tute male, ĝi malebligas la resaniĝon de la pacientoj kaj zorgas, ke ili restas dumvive dependaj de kelkfojaj ĉiutagaj mezurado kaj injekto de insulino. Ĉar tio estas bonega negoco, oni tute neglektas la eblecojn de la naturkuracado.
Kiel helpas naturkuracado ne nur montris la prelego, sed ankaŭ la reago de membro el Germanio, kiu skribis reage al nia artikolo pri diabeto en la INA-revuo 2004-4:

„Mi havas iom da diabeto kaj nun mi devas diri, ke INA-gazeto estas granda helpo. Anstataŭ pilolo (NovoNorm 0,5) mi elprovis cinamon el la vendejo kontraŭ diabeton. Jes, ja funkcias! Post tagmanĝo kaj vespermanĝo mi manĝas ujeton da kazeo aŭ jogurto kun enmetitaj 2 gramoj da cinamo."

3. La prelego de vicprezidanto Kees Ruig estis aktiviga. Li parolis pri la graveco de atento - al aliaj kaj al sia propra korpo. Li ne restis teoria, sed la partoprenantoj povis tuj sperti, kion signifas atenti al si mem per i.a. spiroekzercoj. Mem fari anstataŭ postuli la faradon nur de la kuracisto estas ja grava kaj prava principo de la naturkuracado, kiun ĉiuj partoprenantoj tiel povis sperti.

Post la fermo de la kunsido multaj homoj venis por fari individuajn demandojn kaj por aliĝi. Dum la kongreso la raportanto ricevis diversajn petojn pri kuracado. Kiel konate, membroj de INA rajtas peti senpagajn konsilojn de niaj fakuloj. Al unu paciento ni povis tre rapide helpi. Temis pri pusanta infekto de la granda piedfingra ungo, kiu doloris kaj eble malhelpus paŝadon. Post nur tri tagoj la infekto malaperis per trifoja taga apliko de etera oleo de japana mento, kiun la raportanto ĉiam kunportas, ĉar ĝi helpas je multaj ĉiutagaj sufer(et)oj.